Í færslunni ræðir hún klukkuna á Íslandi, lýsir því hvernig henni finnst hún aldrei vakna úthvíld hér þrátt fyrir að hafa farið snemma að sofa og ber reynslu sína saman við þann tíma þegar hún bjó í Bretlandi.
Jafnframt bendir hún á rök með því að færa klukkuna. Við gefum Bjarney orðið.
Þegar ég bjó í Bretlandi þá upplifði ég það í fyrsta sinn á ævinni held ég að vakna úthvíld á morgnana, eftir að ég flutti aftur heim þá verð ég sífellt vissari í minni sök um að það hafi með það að gera að þar er samræmi á milli sólar- og líkamsklukku.
Ég er búin að vera að hugsa um þetta síðustu daga, mér finnst ég aldrei vakna úthvíld hérna þrátt fyrir að fara alltaf snemma að sofa, sama með strákinn, hann fer snemma að sofa en mér finnst hann alltaf þreyttur á morgnana. Ég er viss um að við erum ekki ein um þetta!
Ástandinu má í raun líkja við þotuþreytu (enska: jetlag) eftir ferðalög yfir nokkur tímabelti, nema hvað þetta ástand er viðvarandi hjá okkur Íslendingum yfir vetrartímann og kallast klukkuþreyta (enska: social jetlag)
Rökin með því að leiðrétta klukkuna eru:
– mögulega dregur úr skammdegisþunglyndi og með því notkun þunglyndislyfja.
– námsárangur barna og unglinga gæti aukist (og greyin þurfa ekki að labba í skólann í kolniðamyrkri á morgnana)
– Notkun svefnlyfja myndi mögulega minnka þar sem svefnvandamálum myndi vonandi fækka.
– Jafnvel myndi draga úr öðrum heilsufarsvandamálum svo sem sykursýki, hjartasjúkdómum og fleira.Rökin gegn því að leiðrétta klukkuna eru:
– einhverjir vilja frekar hafa bjart seinnipartinn.Sjáið líka bara myndina af tímabeltunum, við ættum frekar að vera -2 hérna á Vestfjörðum, Vesturlandi og Suðvesturlandi heldur en nokkurn tímann 0 GMT!
Er þetta í alvörunni ekki no brainer?? Er ekki til of mikils að vinna til að leiðrétta klukkuna ekki?
Ég hreinlega skil ekki tregðuna til að breyta þessu.
Hvað finnst þér um klukkuna á Íslandi? Finnst þér að við ættum að breyta henni eða hafa hana óbreytta.
