Svanfríður Inga Jónasdóttir, fyrrverandi þingmaður og fyrsta konan sem varð bæjarstjóri á Dalvík, segir ungar konur í dag upp til hópa kraftmiklar og orðnar miklu öruggari en þær voru þegar hún byrjaði í stjórnmálum. Í viðtali við Akureyri Vikublað, sem lesa má hér, segir Svanfríður gaman að sjá nýja hópa taka við keflinu. Þegar hún var ung hafði hún ekki hugmyndaflug til að eiga drauma um að láta að sér kveða í pólitík:
„Þegar við vinkonurnar í gagnfræðaskóla vorum að pæla í hvað við ætluðum að verða þegar við yrðum stórar markaðist val okkar af umhverfinu og þeim konum sem við litum upp til. Við vorum að rifja þetta upp vinkonurnar um daginn og þótt þær haldi því fram að ég hafi ætlað að verða stjórnmálamaður er ég klár á því að ég ætlaði að verða blaðamaður en giftast stjórnmálamanni. Þetta hefur eitthvað skolast til hjá þeim. Mér fannst of langsótt að ætla sjálf í stjórnmálin. Þótt Hulda [Jakobsdóttir, fyrsta konan til að verða bæjarstjóri] hefði verið bæjarstjóri í Kópavogi dugði það ekki til.“
Segir Svanfríður í dag ungar konur í dag upp til hópa kraftmiklar:
„Stelpur eru orðnar svo miklu öruggari, eins og inni á þingi þar sem eru margar flottar ungar konur sem eru svo frjálsbornar og æðislegar. Ég er einnig ánægð með elsta barnabarnið mitt en hann stofnaði femínistafélag með vinum sínum í tíunda bekk. Það er svo gaman að sjá nýja hópa taka við keflinu. Í dag vitum við að femínismi er nauðsynlegur. Það er líka nauðsynlegt að einhverjir séu virkilega agressífir til að kalla fram viðbrögð og skerpa á umræðunni því það gerist lítið ef við ætlum öll að vera „mainstream“. Það þarf einhver að færa út mörkin. Þannig skapast rými fyrir fleiri. Það er enn langt í land. Baráttan er ekki orðin sjálfbær. Við þurfum enn að hafa fyrir henni á hverjum degi. Um leið og baráttufólk slakar á kemur bakslag. Þess vegna verðum við öll að vera meðvituð um það hvað við erum að gera, segja og hvernig við viljum haga lífinu.“
