Einkasýning Hörpu Daggar Kjartansdóttur stendur nú yfir í Falun í Svíþjóð, en sýningin er  hluti af listahátíðinni Sammankomsten í Falun.

Einkasýningin Organizing chaos í Galleri Hörnan var unnin í samvinnu við Gallerí SE og er hluti af listahátiðinni Sammankomsten sem haldin var í Falun 23.-25.ágúst. En sýningin stendur til 1.október næstkomandi.

Í Galleri Hörnan sýnir Harpa skúlptúra og myndverk sem unnin eru með blandaðri tækni.

Í verkum sínum notast hún við fundið efni sem er sett saman á óvæntan og ljóðrænan hátt. Hlutirnir fá nýtt samhengi og skapa samtal sín á milli.

Svartur litur er gegnumgangandi í verkunum. Bæði í skúlptúrum og myndum. Í myndunum er bakgrunnurinn málaður svartur og á þeim verkum sem unnin eru á blaðsíður úr gömlum bókum, þekur svarti liturinn textann. Bakvið ‘tómarúmið’ er því eitthvað hulið. Líkt og svarthol sem hefur að geyma mikla dulúð. Myndefnið er oft áþekkjanlegt við fyrstu sýn og minnir á eitthvað annað en það í raun er. Það skapast því svigrúm fyrir áhorfandans að túlka á sinn hátt. Við lesum í myndmál á ólíkan hátt, myndum ólíkar tengingar út frá okkar eigin bakgrunni og reynslu.

„Ég hef meiri áhuga á að varpa fram spurningum og vangaveltum, frekar en að koma með lokaniðurstöðu eða rétt svar. Við skynjum og skiljum umheiminn á ólíkan hátt og í verkum mínum vinn ég með það hvernig hlutir geta umbreyst í nýju samhengi og fengið aðra merkingu.

Umbreyting hluta og myndmáls birtist í ýmsum myndum og sumt breytist á meðan sýningin stendur yfir. Til dæmis litað vatn í tilraunaglösum sem gufar upp yfir sýningartímabilið og skilur þá eftir sig spor eða litaðar rákir á glerinu,“ segir Harpa Dögg.