Meðlimir hljómsveitarinnar Coldplay minntust leikarans ástsæla Gene Wilder á tónleikum í Denver sólarhring eftir lát hans. Þeir léku honum til heiðurs lagið Pure Imagination úr myndinni Willy Wonka and the Chocolate Factory, en Wilder söng lagið mjög eftirminnilega í kvikmyndinni sem er frá árinu 1971. Coldplay flutti lagið í stutta stund meðan ljós voru slökkt. Félagarnir í Coldplay settu myndbrot af flutningnum síðan á netið.

Gene Wilder lést síðastliðinn mánudag í faðmi fjölskyldu sinnar, 83 ára gamall, eftir þriggja ára baráttu við Alzheimer, en hann hafði haldið veikindum sínum leyndum fyrir umheiminum. Hann gekk fjórum sinnum í hjónaband, þriðja eiginkona hans var gamanleikkonan Gilda Radner sem lést úr krabbameini árið 1989, 42 ára gömul. Hann kvæntist fjórðu eiginkonu sinni árið 1991. Hann hélt í hönd hennar og var að hlusta á eitt uppáhaldslag sitt, Over the Rainbow, þegar hann lést.

Wilder lék í fjölmörgum myndum sem enn njóta mikilla vinsælda og má þar nefna Blazing Sadddles, The Producers, Young Frankenstein og Willy Wonka and the Chocolate Factory. Hann var einnig rithöfundur, sendi meðal annars frá sér ævisögu sína og skrifaði þrjár skáldsögur. Hann sagðist hafa farið að skrifa vegna þess að hann fengi ekki lengur send handrit sem vektu áhuga hans. Hann sagði að ekki væru lengur gerðar nógu góðar kvikmyndir og bætti við: „Mér leiðist að horfa á sprengjuárásir, skotbardaga, dráp og fólk sem skiptist á blótsyrðum.“