Gregg Wallace, umsjónarmaður Masterchef, gekk nýlega í hjónaband í fjórða sinn. Eiginkonan heitir Anne-Marie Sterpini og er þrítug en Wallace er fimmtíu og eins árs. Þau kynntust á Twitter árið 2013 þegar hún sendi honum fyrirspurn um rabarbara. Wallace segir næst á dagskrá að eignast börn með konu sinni en hann á fyrir tvö börn. Einkalíf Wallace hefur verið brösugt, fyrsta eiginkona hans yfirgaf hann eftir einungis sex vikna hjónaband, annað hjónaband hans endaði með skilnaði eftir fimm ár og því þriðja lauk eftir átján mánuði en þeirri eiginkonu hafði hann kynnst á Twitter, eins og þeirri núverandi.

Félagi Wallace úr Masterchef, John Torode, var svaramaður hans. Wallace segir að enginn hafi verið betur til þess fallinn. „Hann hefur fylgt mér í gegnum góðu tímana, þá slæmu og þá ljótu. Hann hefur alltaf sýnt mér stuðning, þannig að valið var auðvelt,“ sagði Wallace.