Áttunda þáttaröðin verður sú síðasta
Milljónir aðdáenda sagnabálksins um Game Of Thrones geta nú farið að undirbúa sig undir endalokin því framleiðandi sjónvarpsþáttanna, HBO sjónvarpsstöðin, hefur nú gefið út að þáttunum ljúki með áttunda tímabilinu en það verður sýnt 2018. En það er þó ekki öll nótt úti fyrir hörðustu aðdáendurna því talsmaður HBO vildi ekki útiloka að ný þáttaröð, sem væri gerð út frá Game Of Thrones, yrði framleidd.
Casey Bloys, yfirmaður framleiðslumála hjá HBO, tilkynnti þetta á fréttamannafundi í gær. Hann sagðist ekki vilja útiloka að ný þáttaröð, einhverskonar hliðarþáttaröð (spin-off) yrði gerð í framhaldinu. Áður höfðu David Benioff og DB Weiss, aðalframleiðendur þáttanna, gefið í skyn að þættirnir nálguðust endalok.
Sjöunda tímabil þáttanna verður sýnt næsta sumar en í því verða aðeins sjö þættir en fram að þessu hafa verið 10 þættir á hverju tímabili.
Þættirnir voru tilnefndir til 23 Emmy-verðlauna fyrr í mánuðinum.
