Gamanþættirnir Absolutely Fabulous nutu gríðarlegra vinsælda í Bretlandi á sínum tíma og reyndar víða um heim. Aðalpersónurnar voru vinkonurnar Eddy og Patsy, sjálfhverfar, drykkfelldar og snobbaðar. Með aðalhlutverkin fóru Jennifer Saunders, sem jafnframt var handritshöfundur, og Joanna Lumley. Í byrjun júlí verður frumsýnd í Bretlandi kvikmynd með sömu aðalpersónum og ber myndin sama heiti og þættirnir, Absolutely Fabulous. Myndin fjallar um vandræði vinkvennanna þegar Eddy verður fyrirsætunni Kate Moss að bana fyrir slysni. Kate Moss leikur sjálfa sig í myndinni og meðal annarra gestaleikara eru Kim Kardashian, Lulu, Stella McCartney, Graham Norton og Jerry Hall. Saunders er handritshöfundur myndarinnar.
