Forsvarsmenn Netflix eru sagðir ætla að bæta þjónustu sína við notendur streymiþjónustunnar enn frekar á allra næstu vikum eða mánuðum.

Hingað til hefur Netflix krafist þess að notendur séu ávallt tengdir við netið þegar þeir horfa á efni úr streymisveitunni. Á sama tíma hafa aðrar streymiþjónustur boðið notendum upp á þann möguleika að hala efninu niður til að horfa á síðar, til dæmis þegar viðkomandi er ekki í aðstöðu til að tengjast netinu eins og á ferðalögum. Amazon Instant Video og BBC iPlayer bjóða til dæmis upp á þennan möguleika.

Nú gæti hins vegar orðið breyting á því forsvarsmenn Netflix eru sagðir hafa hafið samstarf við tæknifyrirtækið Taitz um að bæta þessum möguleika við. Breska blaðið Mirror greindi frá því fyrir helgi að jafnvel verði þessi breyting komin í gagnið áður en árið er úti.

Notendur Netflix eru 81 milljón talsins og er þjónustan í boði í 130 löndum, þar á meðal á Íslandi. Netflix hefur notið vaxandi vinsælda á undanförnum árum og er það ekki síst vönduðum og vel heppnuðum þáttum á borð við House of Cards, Making a Murderer, Daredevil og Stranger Things að þakka.

Reed Hastings, stjórnarformaður Netflix, hefur áður látið hafa eftir sér að líklega verði aldrei boðið upp á niðurhal hjá Netflix. Hann virtist þó draga aðeins í land með þær yfirlýsingar sínar í sumar þegar hann sagði að Netflix myndi „skoða málið af opnum hug“.