David Bald Eagle varð kannski þekktastur fyrir hlutverk sitt í mynd Kevins Costner, Dances with Wolves, en hann gerði sannarlega margt merkilegra á langri ævi. Bald Eagle lést nýlega 97 ára gamall. Hann var indjáni, fæddist árið 1919 og bjó hjá afa sínum, Hvítu fjöður. Hinn afi hans var einn af foringjum indjána í baráttunni um Little Bighorn. Báðir afarnir sögðu barnabarni sínu hetjusögur af baráttunni við hvítu mennina.

Bald Eagle lék í kvikmyndum, og var einnig áhættuleikari og kenndi stjörnum á borð við Errol Flynn og John Wayne (sem var góður kunningi hans) að meðhöndla hesta og vopn. Hann var góður dansari og dansaði opinberlega og lék á trommur í hljómsveit. Hann barðist í seinni heimsstyrjöldinni og særðist illa í innrásinni í Normandy.

Fyrri eiginkona hans lést í bílslysi og átti þá von á fyrsta barni þeirra. Bald Eagle sagði að eftir það hefði hann misst lífslöngun. Árið 1958 hitti hann konuna sem varð seinni eiginkona hans. „Hún hélt mér á lífi,“ sagði hann um hana. Þau eignuðust börn og ættleiddu einnig nokkur börn, þannig að fjölskyldan var fjölmenn.

Um kvikmyndaferilinn sagði hann: „Það var alltaf verið að skjóta á okkur indjánana og drepa okkur.“ Hann barðist fyrir því að breyta viðhorfum fólks til frumbyggja Ameríku og var ötull við að kynna öðrum sögu þeirra. Að sögn þeirra sem þekktu hann var hann einstakur maður sem hafði mikla samkennd með fólki.