„Ég var sífellt syngjandi frá því ég man eftir mér,“ segir Inga Sæland í samtali við DV en nýlega var birt á Youtube splunkunýtt lag sem ber heitið Einn fyrir alla. Um er að ræða baráttusöng Flokks fólksins. Lagið er eftir Birgi Jóhann Birgisson og textinn eftir Kristján Hreinsson. Inga syngur lagið af miklum krafti, ómþýðri röddu.

Inga segist aldrei hafa lært söng en „ég söng með nokkrum hljómsveitum á Ólafsvfirði á sínum tíma,“ segir hún. Inga er fædd og uppalin á Ólafsfirði og fluttist þaðan til Reykjavíkur árið 1994, þá orðin 35 ára gömul.

Árið 2006 vakti Inga mikla athygli fyrir þátttöku sína í þættinum X-Factor þar sem hún hreif dómara mjög og féll ekki úr keppni fyrr en í áttunda þætti. Inga segist ekki ætla að taka þátt í slíku ævintýri aftur enda helgar hún nú alla krafta sína starfsemi Flokks fólksins – líka söngröddina eins og heyra má í myndskeiðinu hér að neðan. Inga er sjálf hæstánægð með lagið og segir: „Þetta hefði átt að verða sumarsmellur.“