Ljósið, endurhæfingar- og stuðningsmiðstöð fyrir fólk sem hefur fengið krabbamein og aðstandendur þeirra, varð til árið 2005 fyrir tilstilli nokkurra einstaklinga. Starfsemin hefur vaxið með árunum, og skjólstæðingum og verkefnum fjölgað. Í ár hlaupa 206 einstaklingar fyrir Ljósið í Reykjavíkurmaraþoninu og hafa þegar safnast tæpar sex milljónir króna.

„Markmið Ljóssins er að fólk fái sérhæfða endurhæfingu og stuðning,“ segir Erna Magnúsdóttir, forstöðumaður og stofnandi Ljóssins. Hjá Ljósinu starfar fagfólk sem aðstoðar krabbameinssjúklinga við að byggja upp líkamlegt, andlegt og félagslegt þrek. Einnig er stuðningur í boði bæði fyrir krabbameinsgreinda og aðstandendur, auk fjölbreyttrar dagskrár eins og viðtala, líkamlegrar endurhæfingar og jafningjastuðnings, svo fátt eitt sé nefnt. Hluti af líkamlegri endurhæfingu er hlaupahópur og munu nokkrir taka þátt í Reykjavíkurmaraþoninu, auk aðstandenda og safna áheitum til Ljóssins.

Miðvikudaginn 16. ágúst síðastliðinn var opið hús hjá Ljósinu þar sem öllum sem hlaupa munu til styrktar Ljósinu var boðið í pastaveislu og á fyrirlestur, sem Fjóla Dröfn Guðmundsdóttir sjúkraþjálfari, næringarfræðingur og margreyndur maraþonhlaupari, hélt. Sjálf hleypur hún heilt maraþon til styrktar Ljósinu. Bolir merktir Ljósinu voru gefnir, auk merkis til að bera á bakinu.

Fjóla Dröfn Guðmundsdóttir, sjúkraþjálfari og næringarfræðingur, hélt fyrirlestur um undirbúning, klæðnað og hlaupaleið í maraþoninu. Sjálf hleypur hún heilt maraþon til styrktar Ljósinu.

Góður undirbúningur er nauðsynlegur Fjóla Dröfn Guðmundsdóttir, sjúkraþjálfari og næringarfræðingur, hélt fyrirlestur um undirbúning, klæðnað og hlaupaleið í maraþoninu. Sjálf hleypur hún heilt maraþon til styrktar Ljósinu.

Ljósið var einstaklingsframtak í upphafi

Upphaf Ljóssins má rekja til ársins 2002, þegar Erna starfaði sem iðjuþjálfi á endurhæfingardeild fyrir krabbameinsgreinda á Landspítalanum. Eftir að deildin var flutt inn á Borgarspítalann fór Erna að vinna að því að láta draum sinn um iðjuþjálfun og endurhæfingu fyrir krabbameinsgreinda og aðstandendur utan sjúkrahúss verða að veruleika. Starfsemin var smá í sniðum til að byrja með, tvo eftirmiðdaga í viku í safnaðarheimili Neskirkju. Í dag er starfsemin í björtu og fallegu húsnæði að Langholtsvegi 43, sem félagið á og þar er starfsemi í gangi alla virka daga, allan ársins hring.

„Við erum þakklát öllum þeim sem hlaupa fyrir Ljósið og þeim sem styrkja okkur með áheitum,“ segir Erna. „Framlag þeirra er mjög mikilvægt fyrir starfsemi okkar, en til okkar koma um 400 manns á mánuði og nýta sér þá þjónustu sem hér er í boði.