Leikstjórinn Ken Loach gagnrýnir BBC harkalega fyrir einhliða fréttaflutning af komandi kosningum Í Bretlandi. Hann sakar BBC um að styðja ríkisstjórn Theresu May og beita sér gegn Jeremy Corbyn, formanni Verkamannaflokksins. Hann segir þetta fyrirlitlegt og til skammar og segir BBC verða að svara fyrir fréttaflutninginn. Breski leikstjórinn er yfirlýstur stuðningsmaður Corbins. „Mín skoðun er að ef fjölmiðlar séu ekki frjálsir og óháðir þá sé ekki hægt að hafa frjálsar kosningar,“ segir Loach. Leikstjórinn er ekki einn um þessa skoðun því BBC hefur legið undir ámæli frá ýmsum fyrir fréttaflutning sem þykir ekki hlutlaus.

Síðasta mynd Loach var I, Daniel Blake en umfjöllunarefnið þar er velferðarkerfið og hvernig það bregst einstaklingum. Nokkrir þingmenn Íhaldsflokksins tjáðu sig um kvikmyndina og sögðu af og frá að hún lýsti veruleikanum. Myndin vann til verðlauna á Cannes árið 2016 og fékk áhorfendaverðlaun á Alþjóðlegu kvikmyndahátíðinni í Locarno. Hún var einnig valin besta breska myndin á BAFTA-hátíðinni.

Loach er áttræður. Hann hefur ætíð verið mjög pólitískur í myndum sínum og fjallað meðal annars um fátækt og verkalýðsbaráttu. Hann segir ekki útilokað að hann muni gera nýja pólitíska kvikmynd vinni Íhaldsflokkurinn í kosningunum í júní næstkomandi.