„Er þetta kannski ein forsenda þess að ná árangri í viðskiptum – að hafa slæmt eða valkvætt minni? “ spyr þáttastjórnandinn Egill Helgaon á bloggsíðu sinni.

Egill segir þar að afar slæmt minni virðist einkenna þá sem stunda viðskipti á íslandi. Þetta hafi komið fram hvað eftir annað. „Þarna er bæði um að ræða almennt minnisleysi, minnisglöp og minnisglöppur.“

Í skýrslu rannsóknarnefndar Alþingis bera vitni því iðulega við að þeim reki ekki minni til hvernig staðið var að fléttunum við sölu Búnaðarbankans.

Þannig er á einum stað sagt um Ólaf Ólafsson: „Í vitnisburði Ólafs Ólafssonar fyrir Héraðsdómi Reykjavíkur 30. janúar 2017, kom fram að hann teldi með öllu ótækt að stóla á minnið um viðfangsefni rannsóknarinnar.“

Hreiðar Már Sigurðsson sagðist ekki reka minni til þess hvort Kaupþing eða önnur fyrirtæki í eigu þess, eða undir yfirráðum þess, hafi veitt ráðgjöf, lagt á ráðin um eða fjármagnað kaup Eglu hf., og þar með Hauck & Aufhäuser á hlut ríkisins í Búnaðarbankanum.

Um sama atriði svaraði Sigurður Einarsson að honum væri ekki minnistætt hvernig í pottinn hefði verið búið.

Þá segir um skýrslu sem nefndin tók af þeim Ármanni Þorvaldssyni, Bjarka Diego, Kristínu Pétursdóttur, Steingrími Kárasyni og Magnúsi Guðmundssyni að „enginn þessara aðila kannaðist við eða rak minni til þess að Kaupþing eða dótturfélag þess í Lúxemborg hefðu komið að viðskiptum Hauck & Aufhäuser með hluti í Eglu hf.“

Þá er líka sagt um samhljóða svör Lýðs og Ágústs Guðmundssonar við fyrirspurnum nefndarinnar að „þeim ræki ekki minni til þessara atriða eða annarra sem umræddar fyrirspurnir nefndarinnar beindust að.“

Fjölmörg önnur dæmi eru í skýrslunni um að menn hafi borið við minnisleysi.

Agli þykir þetta sérstakt. „Á fólk með gott minni ekkert erindi í viðskipti?“ spyr hann og hæðist að tilsvörum mannanna. Sjálfur segist hann draga þann djöful að muna alla mögulega og ómögulega hluti.

„En stundum hlýtur maður að hafa áhyggjur af því að þessir viðskiptamenn finni kannski ekki jeppann sinn, þyrluna eða glæsihúsið. Minnisleysi getur tekið á sig alls konar myndir.“