Það var mikið markaregn í Árbænum þegar stjörnum prýtt lið Augnabliks heimsótti Elliða í fjórðu deild knattspyrnu karla á miðvikudagskvöld. Leiknum lauk með 7-2 sigri Augnabliks sem hefur innanborðs nokkrar gamlar kempur úr boltanum. Þeirra á meðal fjölmiðlamennina Hjört Hjartarson og Hjörvar Hafliðason.

Í fyrstu leit út fyrir að þeir hefðu báðir komist á blað með mörkum skoruðum en markamaskínan Hjörtur skoraði tvö mörk og úrslitavefsíðan urslit.net vildi síðan eigna markverðinum Hjörvari sjálfsmark. Hjörvar var þó ekki á því að láta slíkan orðsporshnekki yfir sig ganga, enda jafnan óskeikull milli stanganna og krafðist þess á Twitter að vefsíðan leiðrétti þessar dylgjur. Fékk Hjörvar leiðréttinguna og stendur því keikur eftir misskilninginn.