Tvö ár eru síðan Rebecca Ellison, eiginkona knattspyrnumannsins fyrrverandi, Rio Ferdinands, lést úr brjóstakrabbameini. Á dögunum sýndi BBC heimildamyndina Being Mom and Dad þar sem Ferdinand ræddi opinskátt um sorgarferlið og hvernig hann tækist á við að ala upp þrjú ung börn, nú þegar móðir þeirra væri látin. Eftir þáttinn hafa hlýjar kveðjur streymt til Ferdinands úr öllum áttum og hann kallaður hetja og sannur baráttumaður.

Rebecca var 34 ára gömul þegar hún lést, einungis 10 vikum eftir að hafa greinst með krabbamein. Ferdinand sagði í myndinni að hann hefði leitað huggunar í áfengi eftir lát hennar. Hann ræddi einlæglega um uppeldi barna sinna, Lorenz, 10 ára, Tate, 8 ára, og Tiu, fimm ára. Hann segist hafa fengið styrk frá fjölskyldu og vinum á afar erfiðu tímabili, barna sinna vegna hefði hann farið á fætur á morgnana og reynt að komast í gegnum daginn. Hann segir að það hafi verulega reynt á að vera skyndilega orðinn einstæður faðir sem þyrfti að huga að öllum þörfum barna sinna. „Áður vaknaði ég, borðaði morgunmat með þeim, keyrði þau í skólann og fór svo á æfingu. Mér fannst ég vera að sinna mínum hluta af uppeldinu, en ég var bara að sjá um auðveldu hlutina.“ Hann sagði að jafnvel það að koma börnunum í háttinn vefðist fyrir honum, þar hefðu ríkt ákveðnar venjur sem kona hans hefði komið á og börnin vildu fylgja og hann þyrfti að læra þær. Hann sagðist stundum hugsa: Hvað sem ég geri, þá verður það ekki nógu gott.

Ferdinand segist viss um að kona hans hefði verið ánægð með heimildamyndina. „Hún myndi vilja að myndin hjálpaði öðrum, hún var þannig manneskja. Þess vegna skipti þessi mynd mig svo miklu máli.“