„Við erum nýbyrjuð að taka á móti umsóknum fyrir keppnina og það eru þegar komnar allnokkrar umsóknir,“ segir Stefán Magnússon, framkvæmdastjóri Hard Rock. Veitingakeðjan stendur fyrir alþjóðlegri hljómsveitakeppni sem ber heitið Battle of the Bands en hún fer fram á um 125 veitingastöðum Hard Rock um allan heim.

Íslenska keppnin verður haldin á Hard Rock Cafe Reykjavík í Lækjargötu og fer fram þann 18. maí nk. Sigurvegari Hard Rock Café Reykjavík fer í úrslit með sigurvegurum Battle of the Bands í Evrópu og sigurvegarar þar fara síðan í úrslitakeppnina þar sem þeir bestu frá öllum heimsálfum mætast.

Stefán á von á því að þátttakan hér heima verði góð. Um sé að ræða stórt tækifæri fyrir íslenskar hljómsveitir. „Keppnin er alvöru stökkpallur fyrir hljómsveitir sem hafa metnað til að hugsa stórt og koma sér á framfæri úti í hinum stóra heimi. Sá sem vinnur aðalkeppnina mun fá mikla athygli á heimsvísu og spila á stóra sviðinu.“