Forseti Íslands, Guðni Th. Jóhannesson, klæðist mislitum sokkum á mynd sem Downsfélagið birtir á Facebook-síðu sinni. Á síðunni kemur fram að fólk um allan heim klæðist mislitum sokkum þann 21. mars ár hvert til að fagna og sýna samstöðu með margbreytileikanum.

Á morgun er Downsdagurinn er og Guðni Th. með þessu að sýna baráttu samtakanna stuðning. Þar er fólk hvatt til að deila myndum af sér í mislitum sokkum á Instagram, með myllumerkinu #downsfelag og #downsdagurinn. „Í veislu félagsins í Laugardal verður stór skjár þar sem myndirnar munu birtast.“

Við myndina á síðu Downsfélagsins má sjá að stuðningur forsetans mælist vel fyrir „Það er frábært að hafa þennan forseta sem ekki gerir greinarmun á sér og venjulegu fólki. Hann er öllum góð fyrirmynd“ skrifar einn við færsluna.

Sameinuðuþjóðirnar stóðu fyrir því að 21. mars yrði alþjóðadagur Downs-heilkennisins. Markmiðið er að auka vitund og minnka aðgreiningu. Dagsetningin vísar til þess að Downs-heilkenni er orsakað af auka litningi 21. Með öðrum orðum hafa þeir sem eru með Downs þrjú eintök af litningi númer 21. Á síðu Downsfélagsins kemur fram að haldið verði upp á daginn í veislusal Þróttar á milli klukkan 17 og 19 á morgun. „Frábært tilefni til að hittast og gleðjast saman. Jón Jónsson mun gleðja okkur með nokkrum lögum. Hlökkum til að sjá sem flesta.“