„Þetta er samfélagsmein sem kostar tíma og veldur mörgum sálarangist,“ segir Finnur Pálmi Magnússon, foreldri sem er alveg komið með nóg af því að opna viðhengi í tölvupóstum.

Finnur skrifar opið bréf til stjórnenda menntastofnana, leikskóla og tómstundafélaga, sem er birt í pistli á Vísi.

Vinaleg ábending

Finnur byrjar á því að þakka stjórnendum fyrir að halda sér upplýstum um framgang barnsins síns og helstu viðburði á vegum stofnunarinnar.

„Mig langaði samt að benda vinalega á að þessari áráttu með að setja allar upplýsingar í viðhengi verður að ljúka,“ segir hann og bætir við.

„Það eru engin rök fyrir því að þvinga okkur sem veitum póstunum viðtöku að opna PDF skjöl til að komast að efni póstsins. Svo ekki sé talað um Word skjöl. Ég er ekki með Word á símanum mínum.“

Finnur segir að einu rökin sem hann hefur heyrt sem „styðja við þessa viðhengja áráttu er að þannig sé hægt að hafa betri stjórn á letri og uppsetningu.“

Hann segir að það eigi ekki við um tölvupóst. „Þegar lesa skal tölvupóst, þá erum við með alls kyns tæki og forrit sem við höfum valið og stillt til að lesa texta á því sniði sem hentar okkur.“

Finnur leggur síðan fram nokkur rök sem mæla með því að skrifa efni tölvupósts í sjálfan tölvupóstinn.

„Færri smellir og tímasparnaður; Maður opnar póstinn og les efnið. Leit; Það er betri stuðningur við að leita í efni póstsins en viðhengjum.[…] Öryggi; Það er sífellt verið að brýna fyrir fólki að opna ekki viðhengi vegna hættu á vírusum. Þið eruð að þjálfa fólk til að opna viðhengi margoft á dag. Aðgengi; Fólk les pósta í símum og á tölvuskjám í mismunandi forritum sem þeim henta,“ segir hann í pistlinum á Vísi, en þar er hægt að lesa rökin í heild sinni.

Hvað segja lesendur? Ættum við, eins og Finnur orðar það, að taka nú höndum saman og hætta þessu?