Það hvort hundar séu gáfaðri en kettir – eða öfugt – er spurning sem oft verður að þrætuepli milli hundaeigenda annars vegar og kattaeigenda hins vegar. Nú telja vísindamenn sig hafa svar á reiðum höndum.

Það voru vísindamenn við Vanderbilt University sem rannsökuðu heilastarfsemi þessara vinsælu gæludýrategunda og niðurstöðurnar þurfa kannski ekki að koma sérstaklega á óvart. Hundar eru gáfaðri en kettir.

Suzana Herculano-Houzel, einn þeirra vísindamanna sem stóð að rannsókninni, bendir á að taugafrumur í heilaberkinum beri ábyrgð á flóknum þáttum heilastarfseminnar, til dæmis hugsun og skipulagningu. Fjöldi þessara frumna segi til um ýmislegt; til dæmis getu dýranna til að draga lærdóm af hlutum og getu þeirra til að spá fyrir um hvað muni eiga sér stað, byggt á fyrri reynslu.

Suzana segir að hundar hafi að jafnaði 530 milljónir taugafrumna í heilaberkinum en kettir um 250 milljónir. Til að draga þetta saman þýðir þetta að hundar eru betur í stakk búnir til að taka flóknar ákvarðanir en kettir.

Niðurstöðurnar voru birtar í tímaritinu Frontiers in Neuroanatomy. Niðurstöður rannsóknarinnar leiddu fleira merkilegt í ljós. Þannig eru hundar af tegundinni golden retriever með fleiri taugafrumur í heilaberkinum en hýenur, ljón og brúnbirnir sem eru með svipaðan fjölda frumna og kettir. Brúnbirnir eru með mikið mun stærri heila en kettir.

Suzana segir að ástæðan fyrir þessu sé sú að rándýr, á borð við brúnbirni, verji miklum tíma í hvíld. Þar af leiðandi hafi heili þeirra ekki sömu möguleika á að þróast og þroskast eins og heilar annarra dýra, katta til dæmis.

Þess má geta að manneskjur eru með að jafnaði 16 milljarða taugafrumna í heilaberkinum.