Ferill leikarans hefur ekki náð þeim hæðum sem hann vonaðist eftir en þrátt fyrir það er hann ekki af baki dottinn og á sér enn þann draum að verða frægur leikari í Hollywood.
„Ég upplifði marga dásamlega hluti þegar ég var yngri,“ sagði hann í viðtali við People á dögunum og bætti við að leiklistin væri það sem hann vilji einbeita sér að í framtíðinni.
„Maður verður að trúa því að þetta muni takast og gera allt sem maður getur til að vinna í þá átt,“ sagði hann.
Á árunum upp úr aldamótum fór að hægjast á ferli Lipnicki sem fór í leiklistarnám og tók hann þar af leiðandi að sér færri hlutverk en hann hafði gert sem barn. Hann reyndi um tíma fyrir sér í blönduðum bardagalistum (MMA) og kom sér í frábært form en leiklistin átti alltaf draum hans allan og hefur hann nú lagt bardagaíþróttirnar á hilluna.
Það vill oft verða þannig að leikarar sem slá í gegn sem börn eigi í ákveðnum erfiðleikum með að fóta sig í leiklistinni á fullorðinsárunum og er Home Alone-leikarinn Macaulay Culkin líklega eitt besta dæmið um það.
Lipnicki segir í viðtalinu við People að hann hafi verið afkastamikill á síðustu árum en verkefnin sem hann hefur tekið að sér hafa ekki verið mjög áberandi.
Kveðst hann ætla að vanda valið betur í framtíðinni og vera varkárari í vali á gæðaefni. Þannig segist hann hafa hafnað fimm verkefnum síðasta árið til að leggja meiri áherslu á gæði.
„Ég vil virkilega snúa þessu blaði við. Ég bið fyrir því á hverju kvöldi að ég fái leiðsögn um hvert ég eigi að stefna og ég er enn viss um að það besta á mínum ferli eigi eftir að koma. Maður verður að trúa því og hugsa stórt.“
