Pistlar Ragnhildur Þórðardóttir sálfræðings, betur þekkt sem Ragga nagli, sem skrifaðir eru á mannamáli njóta mikilla vinsælda á Facebook-síðu hennar. Í þeim nýjasta fjallar Ragga um hreyfingu í daglegu lífi okkar, þar sem mottóið er að eitthvað er alltaf betra en ekkert.

„Eitthvað er alltaf betra en ekkert. ALLTAF…. ALLTAF….pakkað í sellófan með slaufu. Kortér af sippi. 10 armbeygjur Lyfta sófanum Hoppa á staðnum í 10 sekúndur Og einhver smotterís hreyfing mun halda venjunni á lífi og styrkja þá týpu sem þú vilt vera. Þessi hrausti og ræktaði. Þessi sem missir ekki af æfingu sama hvað. Vaninn styrkist í sessi sem kemur þér af stað aftur á morgun og hinn og hinn og hinn.

Heflaðir bronsskrokkar á Instagramm telja þér trú um að ef þú getur ekki farið í klukkutíma langa æfingu með rassasvita og reytt hár geturðu alveg eins sleppt þessu,“ segir Ragga.

„Allt í botn. Algjör grimmd í dag Farðu hart eða farðu heim. Það er hrossaskítur.“

Lífið er þó alls konar og því er skítsama um slíkar áætlanir okkar segir Ragga og nefnir sem dæmi að barnið sé veikt, fundur í vinnunni eða það springur á bílnum.

„Að pressa inn sextíu mínútum á svoleiðis ömurðardögum verður flóknara en að skipuleggja fund með G8 þjóðunum. Svo þú gefur skít í þetta. Sem verður oft dómínókubbur og næstu dagar fara í vaskinn líka. Þá er sálin svekkt því þú ert lúser. Róni og ræfill. Aumingi og mannleysa. Sálin er mölvuð.“

Ragga segir mun betra fyrir sálartetrið að setja markið það lágt að þú sért alltaf sigurvegari.

„Sálin verður sátt því þú ert sigurvegari. Meiriháttar meistari. Stórkostlegur snillingur. Djö… er ég með’etta. Skrúfaðu niður í áhrifaskvaldri örhrifavalda á samfélagsmiðlum.

Gerðu það sem passar inn í dagskrána á hverjum degi. Ef það þýðir að smokra bara inn ogguponsu af hreyfingu þá er það nógu gott. Þú masteraðir mætinguna og styrktir vanann í sessi. Smávegis af einhverju er alltaf betra en fullt af engu.“