Vikuna 22. – 29. nóvember, í aðdraganda aðventu, heldur Borgarbókasafnið veglega lestrarhátíð fyrir börn og fjölskyldur.

Lögð verður áhersla á að skapa notalegar stundir fyrir alla fjölskylduna. Höfundar mæta og lesa úr jólabókunum og stýra föndursmiðjum og heitt kakó og smákökur verða í boði.

Höfundar og barnakór koma fram

Hátíðin hefst á bókasafninu í Gerðubergi í Breiðholti laugardaginn 22. nóvember kl. 13. Höfundarnir Embla Bachmann og Gunnar Helgason lesa úr nýjum bókum sínum og barnakórinn Graduale Liberi undir stjórn Bjargar Þórsdóttur flytur lög úr Dýrunum á Fróni eftir Stefan Sand og Alfreð Guðmundsson. Auk þess stýrir Iðunn Arna Björgvinsdóttir myndhöfundur skemmtilegri smiðju úr bókaflokknum vinsæla Bekkurinn minn. 

Lestrarhátíð býður upp á fjölbreytta dagskrá alla vikuna þar sem hver viðburðurinn rekur annan fram til sunnudagsins 29. nóvember.

Hvítur föstudagur í Kringlunni

Á svörtum föstudegi verður haldinn hvítur föstudagur á Borgarbókasafninu Kringlunni. Ævar Þór Benediktsson og Þórarinn Eldjárn lesa upp úr nýjum barnabókum, auk þess sem boðið verður upp á krakkajóga, hvítt kakó og smákökur.

Elsti núlifandi rit- og myndhöfundur landsins

Á Borgarbókasafninu Árbæ verður sögustund og furðufiskasmiðja úr Rauða fiskinum eftir Rúnu en það er Ragnheiður Gestsdóttir barnabókahöfundur og dóttir Rúnu sem les upp úr nýrri útgáfu af þessari sígildu perlu og stjórnar smiðjunni. Rúna varð 99 ára á dögunum og er elsti núlifandi rit- og myndhöfundur Íslands.

Kósí jólaball með undirspili og söng

Hátíðinni lýkur á Borgarbókasafninu Spönginni í Grafarvogi þar sem lesið verður upp úr nýjum jólalegum barnabókum og dansað kringum jólatré með undirspili og söng.

Nánar um hátíðina alla á heimasíðu Borgarbókasafnsins:

https://borgarbokasafn.is/lestrarhatid-fyrir-born-og-fjolskyldur