Myndin, eða jarmið (e. meme) flaug um netheima þar sem fólk kepptist við að leggja Patrick orð í munn á sama tíma og vinkona hans horfði tómleg til augnanna beint fram. Varð myndin að einskonar tákngerving þess þegar karlar „hrútskýra“ fyrir konum.
Vísar hugtakið til þess þegar karlmaður útskýrir hluti fyrir konu á yfirlætislegan og kannski lítillækkandi máta, til dæmis hluti sem konan veit þó meira um en karlmaðurinn.
En í samtali við Daily Mail segir Ritchie að líklega hafi ekkert slíkt átt sér stað þetta örlagaríka kvöld árið 2018. Stúlkan á myndinni er góð vinkona hans og skólafélagi, Lucia Gorman, og segir Patrick, sem nú er 24 ára, að þau hafi talað mikið saman þetta kvöld.
Sannleikurinn sé samt sá að hann man hreinlega ekkert hvað hann sagði við hana.
„Við vorum á barnum og í stórum hópi og ég hef örugglega talað við hana 10-15 sinnum þetta kvöld. Ég man ekkert hvað ég sagði við hana svo þetta hlýtur að hafa verið skemmtilegt kvöld.“
Hann segir að myndin hafi ekki haft nein áhrif á hann og hún hafi aldrei verið honum til ama.
„Ég hef bara hlegið að þessu. Það var dálítið klikkað hvað þetta sprakk út,“ segir hann. Hann segist enn hitta Luciu reglulega og þau hafi bæðið gaman að myndinni.
Lucia ræddi einnig málið við Daily Mail á dögunum þar sem hún sagðist ekki muna nákvæmlega hvað vinur hennar sagði við hana. Hún man þó að á þeim tímapunkti þegar myndin var tekin hafi hún viljað fara heim. Hún þvertekur fyrir að myndin hafi verið sviðsett.
„Hún lítur kannski þannig út en var það alls ekki. Ég veit ekki einu sinni hvernig mér tókst að gera þennan svip,“ sagði hún.
Dæmi um hvernig myndin hefur verið notuð:
