Bandaríski tónlistarmaðurinn og leikarinn Justin Timberlake var handtekinn í Hampton-hverfinu í New York í fyrrakvöld vegna gruns um ölvunarakstur. Timberlake hafði setið að sumbli með á hóteli í Sag Harbor og var að sögn heimildarmanna töluvert ölvaður.

Nýjar upplýsingar um handtökuna hafa komið fram, meðal annars hvað tónlistarmaðurinn á að hafa sagt við lögreglumanninn sem handtók hann.

Timberlake var að keyra gráa BMW bifreið þegar hann var stoppaður af lögreglu klukkan 00:17 þann 18. júní. Hann hafði virt stöðvunarskyldu að vettugi og átti erfitt með að halda sig á réttum vegarhelmingi samkvæmt dómskjölum.

Lögreglumaðurinn sem stöðvaði hann tók eftir því að augu Timberlake væru blóðhlaupin og að það væri sterk áfengislykt af honum. Það kom einnig fram í skýrslunni að söngvarinn hafi talað hægt og ætti erfitt með að halda athygli.

Eftir að hafa staðið sig illa í ölvunarprófi á vettvangi neitaði Timberlake að gangast undir blóðprufu eða blása í öndunarsýnamæli. Hann neitaði því aftur og var þá í kjölfarið handtekinn.

Timberlake á að hafa sagt við lögregluþjóninn: „Ég fékk mér einn martini og elti vini mína heim.“

Tónlistarmaðurinn var í kjölfarið handtekinn fyrir ölvunarakstur og dreginn fyrir dómara í gær.