„Eiginkona mín, sem er seinni eiginkona mín, vill að við verðum jörðuð hlið við hlið þegar við deyjum, en ég veit að börnin mín verða ósátt ef ég verð ekki jarðaður hjá móður þeirra,“ segir maðurinn í bréfi til sambandsráðgjafa The Sun, Deidre.
„Það er meira að segja búið að skilja eftir pláss á legsteini hennar fyrir mig.“
Maðurinn er 63 ára og núverandi eiginkona hans er 61 árs. „Við höfum verið gift í fimm ár. Fyrsta eiginkona mín, móðir barnanna minna, dó fyrir næstum áratug,“ segir hann.
„En seinni eiginkona mín krefst þess að ég verði jarðaður með henni. Hún segist ekki vilja vera ein.
Ég elska hana, en ég mun alltaf elska fyrri eiginkonu mína líka. Ég finn fyrir tryggð við hana og ég veit ekki hvað ég á að gera.
Ég hef ekki rætt þetta almennilega við börnin mín en ég veit að þau búast við því að ég verði jarðaður í fjölskyldugrafreitnum með móður þeirra.
Ég er alveg að missa vitið út af þessu. Ég er ekki spenntur fyrir því en ég er farin að hugsa að það besta í stöðunni sé að vera brenndur.
Það getur ekki verið að ég sé sá fyrsti sem er að glíma við þetta vandamál. Hvað ætti ég að gera?“
„Það er viss huggun í því að vita að þú sért með hvíldarstað nálægt þeim sem þú elskar.
Börnunum þínum mun þykja vænt um að geta heimsótt foreldra sína á sama staðnum þannig það er skiljanlegt að þú viljir ekki taka það frá þeim.
Reyndu, mjög varfærnislega, að útskýra þetta fyrir eiginkonu þinni. Vertu skýr með að þetta snúist um óskir barnanna þinna, að þetta þýði ekki að hún sé minna mikilvæg en fyrsta eiginkona þín.
Ef þú lætur brenna þig þá geturðu skipt öskunni á milli eiginkonu þinnar og barnanna þinna. En ekki gera það ef þú vilt það ekki.
Sama hvað þú ákveður, passaðu að hafa það skriflegt.“
