Bandaríska tónlistarstjarnan Taylor Swift er nú á tónleikaferðalagi í Ástralíu. Á tónleikum hennar á krikketleikvangi í Melbourne um síðustu helgi vakti það athygli að nokkur fjöldi sæta framarlega á leikvanginum voru auð. Leikvangurinn er sagður taka um 100.000 manns í sæti en 96.000 voru viðstödd tónleikana. Sætaframboð er þó sagt breytilegt eftir því um hvernig viðburð er að ræða og líklega var því uppselt á tónleikana. Ástæðan fyrir auðu sætunum reyndist vera sú að einn tónleikagesta gat ekki hamið áfengisdrykkju sína.

Sæti svo framarlega á tónleikum Taylor Swift kosta nokkur hundruð dollara, andvirði tugi þúsunda íslenskra króna en það var nokkuð áberandi að þó nokkurt svæði var autt.

Fram kemur í umfjöllun ástralska fjölmiðilisins 7 news að drukkinn tónleikagestur hafi ælt yfir svo stórt svæði að rýma þurfti umrædd sæti í tvo klukkutíma á meðan þau voru þrifin og sótthreinsuð. Gestirnir gátu loks snúið aftur í sæti sín um klukkan 9 um kvöldið þegar langt var liðið á tónleikana.

Segir einn þeirra að hópurinn hafi á meðan staðið á svæði nærri sætunum og það sé ömurlegt að svona langan tíma hafi tekið að þrífa þau.

Sætin sem þurfti að rýma voru það nálægt sviðinu að vel sást á myndum frá tónleikunum að þau væru auð. Þau fjölmörgu sem fengu ekki miða á tónleikana urðu afar svekkt við að sjá þetta og fóru ekki í grafgötur með það á samfélagsmiðlum. Mörg þeirra spurðu hvers vegna í ósköpunum svona mörg sæti væru auð.

„Ég gæti setið þarna,“ sagði einn vonsvikinn aðdáandi en nú þegar ástæðan fyrir þessu er komin í ljós er viðkomandi líklega feginn að hafa ekki setið einmitt í þessum sætum.

Ástralir hafa annars tekið ástfóstri við Swift. Hún hélt þrjá tónleika á krikketleikvanginum í Melbourne síðasta föstudag, laugardag og sunnudag. Á öllum þremur tónleikunum voru 96.000 manns viðstaddir og segist Swift aldrei hafa haldið tónleika fyrir eins marga gesti í einu. Í lok þriðju tónleikanna tjáði hún íbúum Melbourne ævarandi ást sína.