Sönggyðjan Tina Turner er látin, 83 ára að aldri. Frá þessu greina bandarískir fjölmiðlar og vísa í yfirlýsingu frá talsmanni söngkonunnar.

„Tina Turner, „drottning rokk og róls“ lést friðsamlega á heimili sínu í Kusnach nærri Zurick í Sviss, í dag á 84 aldursári eftir langa baráttu við veikindi. Heimurinn hefur með henni misst goðsögn í tónlist og fyrirmynd.“

Tina Turner, fæddist sem Anna Mae Bullock, í smábæ í Tennessee árið 1939. Það var fyrrum eiginmaður hennar, Ike, sem uppgötvaði hæfileika hennar eftir að hún hafði laumast í míkrófóninn kvöld eitt þegar hljómsveit hans hafði brugðið sér af sviði skemmtistaðar. Þau gáfu svo saman út lagið A Fool In Love og eftir þetta varð Anna Mae aldrei þekkt sem annað en Tina Turner.

Tina fékk viðurnefnið drottning rokk og róls eftir að hún gerði garðinn frægan með þáverandi eiginmanni sínum, Ike Turner, áður en hún festi sig rækilega í sessi sem goðsögn með gífurlega farsælum sólóferli þar sem hún átti hvern hittarann á eftir öðrum. Af frægustu lögum hennar má nefna Private Dancer, Typcial Male, What’s Love Got to Do with It og svo ódauðlega lagið Proud Mary.

Hún var þekkt fyrir sprengikraft sinn á sviði þar sem hún dansaði trylltan dans og söng af innlifun.

Það vakti líka eftirtekt þegar Tina sagði skilið við Ike, en hann hafði beitt hana hrottalegu heimilisofbeldi. Tina steig fram og talaði opinskátt um sambandið og lýsti glóðaraugum, sprungnum vörum, brotnum kjálka og öðrum áverkum sem Ike hefði valdið henni og hún þurfti ítrekað að leita sér læknisaðstoðar vegna.

„Saga Tinu er ekki saga fórnarlambs heldur saga ótrúlegs sigurs,“ sagði söngkonan Janet Jackson um Tinu í tilefni af því að tímaritið Rolling Stones nefndi Tinu meðal 100 bestu tónlistarmanna heimsins.

Tina reyndi einnig fyrir sér á stóra skjánum og lék á móti Mel Gibson í Mad Max myndinni – Mad Max Beyond Thunderdome og hver getur gleymt ódauðlega titillaginu Golden Eye úr samnefndi kvikmynd um spæjarann James Bond. Hún lagði skóna á hilluna eftir gífurlega farsælt tónleikaferðalag árið 2009 og í kjölfarið gerðist hún svissneskur ríkisborgari.

Ekki voru seinustu ár hennar auðveld. Elsti sonur hennar, Craig, tók eigið líf og í desember lét yngri sonur hennar, Ronnie lífið.

Hún lætur eftir sig eiginmann og tvo syni Ikes sem hún hafði ættleitt.