Masterson var fundinn sekur í maí 2023 um að hafa nauðgað tveimur konum. Dómurinn var kveðinn upp þann 7. september síðastliðinn og var hann dæmdur til 30 ára fangelsisvistar.
Phillips, 43 ára, og Masterson, 47 ára, hafa verið gift síðan árið 2011 og eiga saman níu ára gamla dóttur.
Leikkonan, sem er hvað þekktust fyrir leik sinn í kvikmyndunum Almost Famous og Bully, er sögð hafa hágrátið þegar dómurinn yfir eiginmanni hennar var kveðinn upp.
Hún hefur nú sótt um skilnað og hefur einnig óskað eftir því að nafni hennar verði breytt úr Bijou Phillips Masterson í Bijou Phillips.
Masterson er hvað þekktastur fyrir að leika Steven Hyde í vinsælu þáttunum That 70‘s Show í kringum aldamótin.
Hann lék einnig eitt af aðalhlutverkunum í Netflix-þáttunum The Ranch en var rekinn í desember 2017, eftir að fjórar konur sökuðum hann um nauðgun. Hann neitaði öllum ásökunum á sínum tíma.
Í júní 2020 var hann ákærður fyrir að nauðga þremur konum á heimili sínu í Hollywood Hills á árunum 2001 til 2003.
Aðalmeðferð í málinu fór fram í október og nóvember í fyrra en dómari dæmdi réttarhöldin ómerk þar sem kviðdómur gat ekki komið sér saman um úrskurð.
Málið var tekið upp að nýju í maí síðastliðnum og var hann fundinn sekur um að hafa nauðgað tveimur af þremur konunum sem kærðu hann. Þann 7. september var dómurinn kveðinn upp og var hann dæmdur til 30 ára fangelsisvistar.
Sjá einnig: Hrottalegar lýsingar í kynferðisbrotamáli Danny Masterson og ógnvekjandi viðbrögð Vísindakirkjunnar
Masterson bar ekki vitni við réttarhöldin og hefur haldið fram sakleysi sínu frá upphafi.
Leikarinn er í vísindakirkjunni og segjast þolendur hans hafa verið áreittir af kirkjunni eftir að hafa leitað til lögreglu vegna hans.
