Tokyo Toni, móðir fyrirsætunnar Blac Chyna, virtist vera að rúlla jónu á meðan hún lét Kardashian-Jenner fjölskylduna fá það óþvegið í beinni á samfélagsmiðlum.
Blac Chyna er barnsmóðir og fyrrverandi kærasta Robert Kardashian. Á mánudaginn hófst mál hennar gegn Kim Kardashian, Khloé Kardashian, Kylie Jenner og Kris Jenner. Hún heldur því fram að framleiðendur sjónvarpsstöðvarinnar E! hefðu orðið fyrir áhrifum Kardashian-Jenner kvennanna þegar kom að því að aflýsa fyrirhuguðum raunveruleikaþætti hennar, Rob & Chyna, og það hefði valdið henni fjárhagslegu og andlegu tjóni.
Sjá einnig: Kardashian systur auðsýnilega ósáttar í dómsal vegna athugasemdar um kynlífsmyndband Kim
Tokyo Toni var í dómsal ásamt dóttur sinni á mánudaginn og um kvöldið fór hún ófögrum orðum um raunveruleikafjölskylduna á samfélagsmiðlum. Hún sagði að stjörnurnar hefðu verið „ógnvekjandi“ í útliti.
„Þetta er svo sorglegt. Síðan hristi Khloé höfuðið við öllu því sem kviðdómararnir sögðu. Er í lagi með þig, tík? Þarftu Xanax eða eitthvað, tík?“ Sagði hún.
Samkvæmt Page Six virtist Tokyo Toni, 50 ára, vera að rúlla jónu á meðan hún var í beinni og því lengra sem leið á streymið varð hún sundurlausari í tali.
Hún sagði Kris Jenner vera „gamla og útslitna“ og líkti henni við „litla manninn á þríhjólinu“ í hryllingsmyndinni Saw.
„Þær líta út fyrir að vera dauðar,“ sagði hún.
Val á kviðdómi hélt áfram í gær og vakti lögfræðingur Kardashian-Jenner fjölskyldunnar athygli á Instagram-streymi Tokyo Toni og sakaði hana um að hóta skjólstæðingum sínum.
„[Kris] Jenner hefur áhyggjur af öryggi sínu,“ sagði hann.
Lögfræðingur Blac Chyna sagðist ekki vera meðvitaður um streymið en samþykkti að Tokyo Toni yrði meinaður aðgangur að dómsalnum.
Tokyo Toni var ósátt við ákvörðun dómara um að hún fengi ekki að vera áfram í dómsal og tjáði sig um það í öðru beinu streymi á Instagram á þriðjudaginn. Á meðan því stóð hótaði hún dómaranum í málinu, en athæfið gæti haft alvarlegar afleiðingar þar sem það er refsivert að hóta dómara. TMZ greinir frá.
