Valgerður Þorsteinsdóttir var um tvítugt þegar hún kærði meint kynferðisbrot voldugs manns í Grímsey sem höfðu staðið yfir frá því hún var á fermingaraldri. Mál Valgerðar vakti þjóðarathygli er hún steig fram snemma árs 2015 í viðtali við Akureyri vikublað og greindi frá brotunum. Hún kærði brotin árið 2014.

Valgerður rifjar málið upp í helgarviðtal við Fréttablaðið.

Málið er sagt hafa klofið íbúa Grímseyjar í tvær fylkingar og það hafði áhrif á útgerðarmál í Grímsey og samstöðu eyjaskeggja og var eins og sprengja inn í þetta litla samfélag. Maðurinn sem Valgerður ásakaði flutti burt úr eynni ásamt fjölskyldu sinni.

Í viðtali við Fréttablaðið gagnrýnir Valgerður skýrslutöku lögreglu í málinu:

„Mér var úthlutað réttargæslukonu en við tengdumst aldrei neitt. Allt andrúmsloftið í yfirheyrslunum var rosalega þurrt og óþægilegt. Mér leið alltaf eins og ég þyrfti að berjast fyrir því að reyna að sannfæra viðstadda um að ég væri ekki að ljúga, líka réttargæslukonuna. Það var enginn mannlegur þáttur til staðar. Ég upplifði að það hefði verið hægt að vinna þessa vinnu miklu manneskjulegar en raunin varð og mér hefði fundist eðlilegra ef sálfræðingur hefði verið kallaður til.“

Eftir að Valgerður kærði fékk hún hótun um meiðyrðakæru frá lögfræðingi mannsins í gegnum Facebook-skilaboð er hún var í skólatíma. Um þetta segir í viðtalinu:

„Eftir viðtalið hafði nánast enginn beint samband við mig, sem var ansi sérstakt. Hins vegar fékk ég nánast strax bréf frá Vilhjálmi Vilhjálmssyni lögfræðingi um að gerandinn ætlaði að höfða meiðyrðamál gegn mér. Vilhjálmur var svo smekklegur að senda mér kæruna í Facebook-skilaboðum, þar sem ég sat í tíma í skólanum mínum.

Sennilega aðallega til að hræða mig fyrir hönd mannsins. En ég er enginn bjáni. Ég hringdi strax í mína lögfræðinga sem sáu um þetta og það varð ekkert úr meiðyrðamálinu, enda engin innistæða fyrir lögsókn. Og þótt það væru fáir í eynni sem höfðu beint samband við mig fékk ég oft að vita í gegnum þriðja aðila hverjir efuðust um það sem ég hafði að segja og hverjir það voru sem ætluðu ekki að taka afstöðu.“

Smellið hér til að lesa helgarviðtal Fréttablaðsins