Í helgarútgáfu Mannlífs er að finna viðtal við hinn þekkta skurðlækni Tómas Guðbjartsson. Greinir hann frá því er hann bjargaði nýlega lífi manns sem særðist í skotárás lögreglu á Egilsstöðum nýlega, en málið var í fréttum. Maðurinn var mjög hætt kominn:

„Hann var orðinn mjög lágur í blóðþrýsingi og búinn að tapa miklu blóði en með neyðarblóði og adrenalíni var hægt að halda uppi blóðþrýstingnum og koma honum lifandi að austan og hingað suður í bæinn,“ segir Tómas.

Tómas greinir frá því að er flugvélin lenti með manninn á Reykjavíkurflugvelli hafi neyðarteymi tekið á móti honum og var farið með hann beint á hjartaskurðdeild. Tómas segir að mjög stórt teymi fagfólks komi að aðgerðum sem þessum og skurðlæknirinn, sem var hann í þessu tilfelli, sé hljómsveitarstjórinn sem þurfi að sjá til þess að allir spili í takt.

Ungur læknir, gamall nemandi Tómasar, pantaði neyðarblóð frá sjúkrahúsinu á Neskaupsstað og pantaði flugvélina frá Akureyri sem flaug með manninn suður. Hrósar Tómas þessari ungu konu og öllum sem komu að málinu á Egilsstöðum fyrir hárrétt viðbrögð, sem og þeim sem komu að málinu á Akureyri.

Tómas segir manninn hafa náð undraverðum bata, sérstaklega miðað við umfang aðgerðarinnar:

„Það eru auðvitað góðar fréttir fyrir ekki bara hann og hans fjölskyldu heldur einnig lögreglumanninn sem lenti í þeim erfiðu aðstæðum að þurfa að hleypa af skoti á manninn.“