Sjónvarpsmaðurinn Piers Morgan er þekktur fyrir umdeild ummæli og lætur sér fátt fyrir brjósti brenna þegar kemur að deilum og rifrildum á opinberum vettvangi, hvort sem það er á sjónvarpsskjánum eða á samfélagsmiðlum.

Ummæli Piers um fimleikastjörnuna Simone Biles nýlega hafa vakið hörð viðbrögð. Það vakti heimsathygli er Biles dró sig úr keppni í úrslitum á Ólympíuleikunum í Tókýó fyrir skömmu á þeim forsendum að hún þyrfti að huga að andlegri heilsu sinni.

Margir lofuðu Biles fyrir hugrekki og hreinskilni, en ekki Piers Morgan sem sagði eitthvað á þá leið að Biles væri að skýla sér á bak við andleg veikindi til að forðast gagnrýni eftir slaka frammistöðu undanfarið.

Á Twitter er enginn skortur á fólki með sterkar skoðanir og óhætt er að segja að Piers Morgan hafi orðið fyrir harðri gagnrýni og miklu skítkasti á Twitter, í kjölfar ummælanna um Bile. Hann hefur ekkert dregið af sér, svarað fyrir sig fullum hálsi og kallar gagnrýnendur sína á Twitter samansafn af heimskingjum.

Í nýjasta tísti sínu ræðir Piers um þekkt og áberandi fólk, sem hann þekki vel, sem „læki“ við andstyggileg tíst um hann. Í lauslegri þýðingu segir Piers:

„Alltaf magnað að sjá þekkt fólk sem ég þekki vel „læka“ andstyggileg tíst um mig … þau halda líklega að þau geti gert það lymskulega og ég taki ekki eftir því. En ég tek alltaf eftir því og skrái hjá mér, geymt en ekki gleymt.“

Eins og nærri má um geta gefur þetta tíst af sér miklar umræður. Einhverjir spyrja Piers hvað hann ætli að gera í þessu. Einn bendir á að honum þykir það vera nokkuð áráttukennt að eyða tíma sínum í þetta. Honum er bent á að hann hafi verið mjög illskeyttur undanfarnar vikur og tekið margt fólk fyrir. Einhver segir að það að þekkja hann sé ekki það sama og að líka við hann. Þá er Piers spurður hvort hann sé nokkuð orðinn ofsóknarbrjálaður. Þá má nefna að Piers er ráðlagt að hætta á Twitter og lesa góða bók.

Always fascinating to see high-profile people that I know quite well ‘liking’ nasty tweets about me … presumably thinking they can do it on the sly and I won’t notice. I always notice, and file away for a rainy day.
🧐☔️

— Piers Morgan (@piersmorgan) August 1, 2021