Sigurborg Ósk Haraldsdóttir, borgarfulltrúi Pírata, notar reglulega Facebook eins og við hin. Hún aðhyllist bíllausan lífsstíl og sést gjarnan á veturna ganga í vinnuna í Kraft-galla. Hún leggur áherslur á umhverfisvernd og endurnýtingu, og er menntaður landslagsarkítekt. Þetta endurspeglast allt í uppáhalds Facebookhópum Sigurborgar.
4. Allar hverfisgrúppur
Inná öllum hverfisgrúppum borgarinnar er að finna mikið úrval mynda af grunsamlegum mönnum sem ganga um borgina, sem og nærmyndir af hundaskít í öllum stærðum og gerðum. Svona myndir eru eitthvað sem við þurfum öll á að halda og lífga virkilega uppá annars gráan hversdagsleikann.
3. Einkabílahatrið
Þessi einstaka grúppa er uppfull af faglegri umræðu þar sem hver miðaldra hvíti karlmaðurinn er sérfróðari en sá næsti. Ég hef þó sérstaklega verið þakklát fyrir þá vönduðu gagnrýni sem ég fæ þar fyrir það að vera gift manni sem eitt sinn var formaður Samtaka um bíllausan lífsstíl. Því að sjálfsögðu er það hann sem hugsar fyrir mig. Ég er bara kona og get jú ómögulega tekið sjálfstæðar ákvarðanir.
2. Spottaði typpi
Þessi grúppa virkilega opnaði augun mín fyrir öllu því fallega sem er að finna í byggðu umhverfi. Hvort sem um er að ræða glæsilegar byggingar eða gatnahönnun, allsstaðar er hægt að spotta typpi. Já og líka í þessum hversdagslegum hlutum líkt og Haribo nammi eða kaktusum.
1. Samtök um bíllausan lífsstíl
Að allri kaldhæðni slepptri er þetta eina grúppan þar sem vitrænar umræður um samgöngur eiga sér stað. Stundum heldur kona að hún sé alveg úti að aka með ákvarðanir um hraðalækkun í borginni, fjölgun göngugatna og uppbyggingu Borgarlínu. Þá er gott að hafa þessu grúppu sem innri áttavita sem hjálpar til við að rétta af umræðuna hér á landi, umræðu þar sem fámennasti hópurinn er sá háværasti og fólk í forréttindastöðu fá meira pláss en annað fólk í samfélaginu. Mæli eindregið, og án kaldhæðni, með þessari grúppu.