Leikkonan Betty White er látin, 99 ára að aldri. Hún hefði orðið 100 ára þann 17. janúar.

„Þrátt fyrir að Betty væri að verða hundrað ára þá hélt ég að hún myndi lifa að eilífu,“ sagði Jeff Witjas, umboðsmaður Betty og náinn vinur hennar, í samtali við People eftir að tilkynnt var um andlát hennar. „Ég á eftir að sakna hennar hræðilega mikið,“ sagði hann.

Betty hefur verið mikið í fréttum að undanförnu í aðdraganda stórafmælisins og var hún í forsíðuviðtali nýjasta heftis People þar sem hún sagðist ætla að fagna afmælinu í hópi fárra en góðra félaga. Raunar átti blaðið ekki að koma út fyrr en 10. janúar en hluti af greininni er aðgengilegur á netinu.

Hún sló eftirminnilega í gegn sem Rose í The Golden Girls og í þáttunum The Mary Tyler Moore shot. Hún hefur reglulega tekið að sér eftirminnileg hlutverk, stór sem smá, og muna margir eftir henni úr myndinni The Proposal frá 2009 þar sem hún lék á móti þeim Söndru Bullock og Ryan Reynolds.

People greindi frá því að hún hafi síðustu ár lifað rólegu lífi í Los Angaeles þar sem hún glímdi við krossgátur og spilaði mikið á spil. Þá naut hún þess að horfa á heimildaþætti um dýr, spurningaþáttinn Jeopardy! og íþróttaþætti, sérstaklega þætti um golf.

Þá sagði Sandra Bullock í samtali við People, í viðtalinu sem var tekið nokkru fyrir andlát Bettyar, að hún vonaðist til þess að Betty nái að fagna afmælinu „með sama hætti og öllum öðrum dögum – með húmor, kærleika og vodka með klaka.“

Hér má sjá upprifjun á skemmtilegum augnablikum með Betty.