Kristinn Hrafnsson, ritstjóri Wikileaks, er meðal þeirra fjölda mörgu sem ekki gefa mikið fyrir kynningarmyndband á nýrri ásýnd KSÍ sem birtist nýlega.  Hann greinir frá áliti sínu í pistli sem birtist á Vísi. 

Hann bendir á að Íslendingar megi vera stoltir af afreksfólki sínu í íþróttum og í listum.

„Það er meira að segja dálítið sætt að belgja sig aðeins út yfir Gleðibanka og víkingaklappi en gleymum bara ekki Kaupþingsbanka og Rannsóknarskýrslu Alþingis.“

Kristinn bendir á að nýleg Eurovision-mynd Will Ferrells hafi verið skemmtileg landkynning þrátt fyrir að góðlátlegt grín væri þar gert af Íslendingum, „Þessari skrítnu smáþjóð með stóra drauma.“

Hins vegar sé myndband KSÍ ekki viðlíka landkynning og varð Kristni hvelft við þegar hann sá ensku útgáfu af þeirri auglýsingu.

„Í morgun sá ég svo ensku myndbandsútgáfuna af lógókynningu KSÍ og hjartað í mér sökk. Þegar smábelgingur ættjarðarástar yfirkeyrist með svona hræðilegum hætti í yfirgengilegan rembing verður manni bumbult. Það er hárfín lína þarna sem menn mega ekki fara yfir en þarna er stokkið yfir hana heljarstökk – í fullum herklæðum.“

Íslendingar virðast skiptast í dag í fylkingar, þeir sem myndband KSÍ lagðist vel í og þeir sem það lagðist þveröfugt ofan í.

Landsliðið í hneykslun

Einn þeirra fyrrnefndu er ritstjóri Viljans, Björn Ingi Hrafnsson.

Hann segir mun á þjóðrembing og venjulegu stolti af landi sínu og þjóð.