Tvö ár eru liðin síðan parið glæsilega, Hermann Guðmundsson fyrrum forstjóri N1 og núverandi forstjóri Kemi og Svava Gunnardóttir matgæðingur, kynntust. Aðdragandinn var skemmtilegur en Hermann las viðtal við Svövu í Morgunblaðinu og hreifst svo af konunni að hann sendi henni skilaboð. Hermann segir svo frá þessu á Facebook-síðu sinni í einlægum skrifum:

Í gær voru slétt 2 ár síðan að ég rakst á þetta viðtal og mér fannst að yrði að senda þessari konu línu og bjóða henni í mat eða kaffi. Ekki grunaði mig hversu afdrifarík ákvörðun það varð en hún svaraði mér nokkrum mánuðum síðar og samþykkti að eiga með mér hádegisverð.

Við héldum uppá daginn í gær og fórum yfir allar þær breytingar sem þessi kynni hafa haft á okkar líf og okkar ættingja. Ástin er merkilegt fyrirbæri og mikið hreyfiafl.

Svava er þekktur matarbloggari á Ljúfmeti og Lekkerheit auk þess sem hún starfar á lögmannsstofunni LEX. Hermann og Svava eru miklir matgæðingar en Hermann starfaði lengi vel sem þjónn á Hótel Holti á sínum yngri árum og Svava þykir afburðagóður kokkur.

Hermann og Svava trúlofuðu sig við Golden Gate brúna í San Francisco í fyrra.

Myndin hér að neðan er ný og tekin af parinu í golfi.