Guðbjörg Hrefna, sem gengur undir listanafninu Hrefnan, var að gefa út sitt fyrsta lag, Starir, í samstarfi með listamanninum NumerusX. Tónlistarmyndband við lagið kom út í gær og segist Guðbjörg hvergi nær vera hætt að semja tónlist.
„Ég er fyrst núna eltast við langþráðan draum sem ég hélt að væri út úr myndinni eftir að ég eignaðist elstu stelpuna mína sem fæddist á 24. viku. En með tímanum breytti hún hvernig ég horfði á lífið,“ segir Guðbjörg.
„Hrefnan gefur mér ákveðið frelsi, þetta er mín leið til að fá nokkurskonar útrás.“
„Ég var búin að vera með litla lagasmíði á heilanum í þó nokkurn tíma, en ég samdi textann seinna meir. Ég hafði samband við NumerusX og honum leist vel á það sem ég hafði fram á að færa. Eftir það hófst eitt skemmtilegasta samstarf sem ég hef tekið þátt í og við erum hvergi nær hætt,“ segir Guðbjörg Hrefna og segir betur frá NumerusX.
„Numerus er tölustafurinn og X er útkoman. Hann er listamaður sem leggur höfuð sitt í bleyti með alls konar tónlist“
Guðbjörg Hreftna segir að lagið hafi verið búið til sem „nokkurs konar heilalím. Textinn er einfaldur og skilaboðin eru skýr,“ segir hún.
Starir verður hluti af næstu plötu NumerusX sem kemur út á næstunni.
Horfðu á myndbandið hér að neðan.
„Ég var svo heppin að fá snillinginn hana Birtu Rán til að vinna með mér og taka upp og klippa Starir tónlistarmyndbandið. Ég er svo gríðarlega þakklát öllum sem tóku sér tíma til að hjálpa og láta þennan villta draum verða að veruleika. Þetta er búið að vera one hell of a ride og ég vil aldrei hætta,“ segir Guðbjörg Hrefna.
