Guðrún Björg Björnsdóttir keypti gamalt fellihýsi og gaf því nýtt líf með nokkrum einföldum breytingum. Fellihýsið fór úr því að vera hálfkallað tískuslys, eða barn síns tíma, yfir í glæsilegan nútímalegan stíl.
„Ég heiti Guðrún Björg Björnsdóttir og hef alltaf haft gaman af því að taka allt sem mér fellur til hvort sem það er húsið mitt, hús annara, hótel eða bara eins og gamla fellihýsið sem við hjónin keyptum okkur og breyta og bæta það sem hægt er. Ef hlutirnir líta ekkert sérlega vel út fyrir, þá hugsa ég það þannig að þótt að ég prufi að breyta þá getur það allavega ekki orðið verra,“ sagði Guðrún í samtali við DV.
Hún hikaði því ekki við að ráðast í breytingar og sá svo sannarlega ekki eftir því.
„Svo ég bara framkvæmi, hika ekki við það. Ég skoðaði Pinterest með hugmyndir og svo var ég með ákveðnar hugmyndir sjálf. Ég ákvað að fara þá leið að nota grátt og svart sem aðal-lit. Fatalituðum svefntjöldin með dökkgráum, vildum ná inn smá myrkri þar fyrir bjartar nætur á sumrin, en jafnframt getum við dregið frá og fengið birtuna inn.“
„Notuðum einnig fatalit á gardínur og krullurnar. Efni litast ekki vel ef það er gerfiefni, en þetta heppnaðist vel og þær hliðar sem tóku ekki vel lit ég einfaldlega læt þær snúa þá annaðhvort inn í svefnrýmið eða út um gluggana. Þá sé ég allavega bara gráa litinn inni“
Gólfið fékk yfirhalningu með dúk og bekkir og borð voru filmaðir.
„Við keyptum dúk í Bauhaus og hann var sniðinn eftir gólfinu með dúkahníf. Á borðin og bekkina settum við svo filmu sem við keyptum einnig í Bauhaus. Fékk svo þessa fínu ráðgjöf frá Slippfélaginu hér í Keflavík og keypti grunn og lakk þar sem heitir Volgur.“
Útkoman er fellihýsi sem lítur út eins og það hafi verið framleitt núna í ár.
