Þrjátíu og fjögurra ára gömul kona losnaði úr viðjum morfínfíknar og ofneyslu á læknadópi árið 2018 og hefur verið edrú í eitt og hálft ár. Fíkniefnaneysla konunnar hófst er hún var 12 ára en athyglisvert er að hún hefur lítið sem ekkert drukkið áfengi.
Konan ólst upp á heimili þar sem mikil fíkniefnanotkun átti sér stað en móðir hennar var fíkill. Tólf ára gömul neytti stúlkan daglega kannabis. Nokkru síðar fór hún úr kannabis í harðari efni. Eftir að hafa verið týnd frá heimili sínu í langan tíma var stúlkan skikkuð í meðferð sem skilaði engum árangri. Þær mæðgur flutti síðan til Danmörku þar sem dóttirin var í daglegri fíknaefnaneyslu árum saman.
Hún kynntist góðum manni og náði að snúa við lífi sínu um tíma. Hún giftist og eignaðist börn en meðfram hjónabandinu og fjölskyldulífinu tók hún að þróa með sér mikla fíkn í morfín og læknadóp. Þessu tókst henni að halda leyndu fyrir eiginmanninum. Fíknin ágerðist og hún þurfti svo stóra skammta að hún var tekin að óttast að hún myndi tapa lífinu vegna ofskammts. Hún elskaði börnin sín en óttaðist að deyja frá þeim. Þessi örvænting varð til þess að hún öðlaðist loksins löngun til að hætta og fór í fyrstu árangursríku meðferðina sína.
Sögu þessa, í miklu ítarlegra og áhugaverðara máli, má heyra í hlaðvarpinu Leiðin til bata. Þar eru viðtöl sem birta átakanlegar en afar áhugaverðar sögu fíkla.