„Símaauglýsing með fullt af nöktum leikurum í íslensku sjónvarpi lætur hjörtun slá hraðar,“ segir í fyrirsögn fréttarinnar sem The Sun birti. Þá lýsir blaðamaður The Sun því sem fram fer í auglýsingunni. „Auglýsingin byrjar með því að fylgja ungri stutthærðri konu í gegnum göng að íþróttavelli. Þegar hún stoppar fer hún hægt úr peysunni sinni og sýnir nakta líkamann sinn áður en hún teygjir hendur sínar og háls. Eftir það sést venjulegt fólk afklæðast, frá manni með rautt hár taka af sér nærbuxurnar á leiðinni í sundlaug til eldri konu sem fer úr brjóstahaldaranum.“
The Sun vitnar í ummæli um auglýsinguna á Twitter. „Var kærastinn minn að senda mér símaauglýsingu með nöktu íslensku fólki? Ég vildi ekki sjá þetta,“ skrifaði einn. „Það er ekki séns að þetta yrði sýnt í bresku sjónvarpi,“ sagði annar.
Þá vitnaði The Sun einnig í Nova og segir hvert markmið auglýsingarinnar er. Textinn sem The Sun birti rímar við það sem Margrét Tryggvadóttir, skemmtanastjóri Nova, sendi DV um auglýsinguna í gær. Þar segir að Nova vilji vekja athygli á mikilvægi geðræktar, þá sérstaklega í sambandi við samfélagsmiðla sem sýni ekki alltaf hlutina í réttu ljósi. Herferðin snúist því um að sleppa glansmyndinni sem birtist á samfélagsmiðlum og velta líkamsvirðingu fyrir sér.
Yfir milljón manns hafa séð auglýsinguna
Auglýsingin hefur þó ekki bara vakið athygli The Sun heldur var henni einnig deilt á eitt stærsta vefsvæði samfélagsmiðilsins Reddit. Um er að ræða vefsvæði þar sem myndböndum er deilt en rúmlega 24 milljónir fylgja vefsvæðinu. Síðan auglýsingunni var deilt þangað hefur hún fengið gríðarlega athygli, um 30 þúsund manns hafa líkað við hana og rúmlega 3.000 manns hafa skrifað athugasemd.
Þegar þetta er skrifað hefur auglýsingin fengið yfir milljón áhorf á myndbandsveitunni Vimeo.