Eve J Marie er Playboy-fyrirsæta, áhrifavaldur og móðir. Hún var á leið frá Dallas til Tulsa með Southwest Airlines (SWA).
Hún segir að eftir að hún hafi komið um borð hafi flugfreyja tilkynnt henni að hún væri að brjóta gegn fatareglum flugfélagsins.
Eve, 26 ára, heldur því fram að henni var gert að skipta um föt eða yfirgefa flugvélina. Hún var í flegnum kjól með hlébarðamynstri.
„Ég var niðurlægð og ég skammaðist mín, en ég var líka mjög móðguð þegar þau hótuðu að reka mig frá borði,“ segir Eve í samtali við Jam Press.
„Ég er A-meðlimur flugfélagsins og er með kreditkort hjá flugfélaginu. Ég er með ýmis fríðindi, sem meðal annars leyfa hverjum sem flýgur með mér að fljúga frítt,“ segir Eve og bætir við að viðhorf farþeganna var engu skárri
„Ég fann fyrir fordómum frá kvenkyns farþegunum vegna klæðavals míns. Þær sögðu að brjóstin mín væru of stór. Ég get ekkert af því gert.“
Þetta var annað flug Eve þennan dag og hún lenti í engum vandræðum í fyrra fluginu. Hún var ekki með föt til skiptanna og endaði með að fá lánaða peysu frá flugfreyjunni.
Eve segir flugfreyjuna hafa verið mjög miður sín yfir málinu og hafi ráðlagt henni að hafa samband við skrifstofur flugfélagsins vegna atviksins, sem hún gerði. Hún hefur hins vegar ekki fengið nein svör um hverjar fatareglur flugfélagsins séu nákvæmlega, en hún fékk fjórtán þúsund króna inneignarnótu vegna málsins. Eve segir það ekki nóg til að bæta upp fyrir niðurlæginguna sem hún upplifði fyrir framan son sinn.
Málið hefur vakið athygli fjölda fjölmiðla á borð við Independent, NY Post, Wired, Mirror og Fox News.
