Ýmislegt athyglisvert er að finna á sölusíðum samfélagsmiðlanna en það er ekki algengt að rekast þar á dýr listaverk til sölu. En fyrir skömmu staldraði blaðamaður við auglýsingu í hópnum Brask og brall.is þar sem óskað er eftir tilboðum í glæsilegt málverk eftir Tolla Morthens. Um er að ræða fyrsta verkið í seríunni Stríðsmenn andans.
Eigandinn, Gilbert Sigurðsson, segist telja að Landsbankinn eigi mikið af þessari frægu myndaröð Tolla en listaverkasafn Landsbankans er rómað.
Ásett verð er 1.300.000 krónur en eigandinn segir að það sé eftir hans bestu vitund það verð sem verkið er metið á. „Ég er enginn listaverkasafnari en góðir menn tjá mér að þetta sé matið,“ segir hann en er opinn fyrir öðrum verðhugmyndum.
Hluti af söluverðinu, eða 500.000 krónur, mun renna til Barnaspítala Hringsins í formi leikjatölva, ferðatölva og annarra leikfanga handa ungum sjúklingum. Kaupanda verksins er velkomið að taka þátt í þeim kaupleiðangri.
Nánari upplýsingar veitir eigandinn í einkaskilaboðum á Facebook-síðu sinni.