„Ef þú ætlar bara að sjá eina mynd um verðlag á mjólk á Íslandi, horfðu þá á þessa,“ segir breski gagnrýndaninn Deborah Ross og á þar við kvikmynd Gríms Hákonarsonar Héraðið. Grein hennar  birtist á dögunum á vef The Spectator sem er eitt elsta vikurit Bretlands.

Deborah fer fögrum orðum um verkið og lofsyngur frammistöðu aðalleikkonunar Arndísar Hrannar Egilsdóttur í hlutverki Ingu, miðaldra kúabónda í Erpfirði sem gerir uppreisn gegn kaupfélaginu á staðnum en gengur erfiðlega að fá aðra  bændur í lið með sér þar sem kaupfélagið hefur sterk ítök í sveitinni.

Deborah byrjar á því að velta fram spurningunni hvort að samkomubannið sé farið að hafa fullmikil áhrif þegar íslensk kvikmynd um verðstríð á mjólk verði fyrir valinu. Eftir áhorfið hafi henni verið einstaklega annt um verðlagið á mjólk á Íslandi.

Hún segir söguna minna á Davíð og Golíat:  lítilmagnarinn sem rís upp og  sem vinnur bug á sterkari óvini. Áhorfendur vita alltaf nákvæmlega hvað liggur undir  og með hverjum þeir eigi að halda. Það sem standi upp úr sé hrífandi náttúrufegurð Íslands og prjónafatnaðurinn, sem hljóti að valda ægilega miklum kláða en sé hugsanlega hægt að venjast.

Þá hrósar hún frammistöðu Arndísar Hrannar Egilsdóttur í hástert: segir hana „stórkostlega“ í hlutverki miðaldra konu sem rís upp í karlaveldi og um margt minna á Hollywood stjörnuna Frances McDormand.

Deborah minnist á það að lokum að í enda myndarinnar hafi hún lifað sig svo inn í átökin sem áttu sér stað í sögunni að  að hún var komin fram á stólbrúnina af spennu.