Kvikmyndin End of Sentence er fyrsta mynd Elfars Aðalsteinssonar í fullri lengd en hann vakti mikla athygli fyrir nokkrum árum fyrir stuttmyndina Sailcloth með John Hurt í aðalhlutverki. Myndin segir frá Frank Fogle (leikinn af John Hawkes), sem leggur í vegferð til að uppfylla hinstu ósk eiginkonu sinnar, en hann þarf einnig að uppfylla loforð um að taka son þeirra Sean með. Langferð frá Ameríku til Írlands með föður sínum er hins vegar það síðasta sem Sean hefur í hyggju er hann stígur út úr fangelsi í Alabama og að dreifa ösku móður sinnar í stöðuvatn á uppeldisslóðum hennar gengur þvert á hans framtíðaráætlanir.

Sjá einnig: Viðtal við John Hawkes: „Góður leikari þarf að vera ósýnilegur”

„Ég kem sjálfur frá mjög óhefðbundnu sambandi föður og sonar. Ég er alinn upp hjá móðurforeldrum mínum og ég á fjögur börn sjálfur, þar af þrjá syni og er að skoða það þeim megin frá. Það er það sem dró mig að þessari sögu og þess vegna fannst mér ég þurfa að gera þessa mynd,” segir Elfar.

Elfar, sem er fyrrverandi forstjóri Eskju, hefur spreytt sig í tónlist og kvikmyndagerð en þegar kom að því að helga lífi sínu hinu síðarnefnda segir hann að það hafi ekki verið gáfuleg ákvörðun á efnahagslegum forsendum. „Fram að því hafði ég valið með höfðinu, en þarna ákvað ég að velja með hjartanu,” segir Elfar.

Viðtal DV við Elfar má finna í heild sinni að neðan.