Varafyllingar hafa notið síaukinna vinsælda á Íslandi síðustu misseri, eins og DV hefur sagt frá. Í viðtali við DV sagði lýtalæknirinn Ágúst Birgisson að slíkar aðgerðir væru ekki hættulausar af ýmsum ástæðum.

„Fyrst og fremst getur verið mar eða blæðing, það getur verið ofnæmi fyrir efninu með bólgu sem er þrálát og erfitt að eiga við. Svo getur verið blóðþurrð ef það lokast æð í kring. Þetta er ekki áhættulaus aðgerð. Kannski algengasta áhættan er að það er einhver ójafna sem er þá hægt að laga. Það er hægt að laga með því að setja lyf sem leysir upp fylliefnið ef maður er óánægður með þetta og náð því niður þannig,“ sagði Ágúst í viðtali við DV um miðbik apríl mánaðar. Nú varar húðlæknirinn Jenna Huld Eysteinsdóttir fólk við að láta ómenntaða aðila framkvæma þessar aðgerðir.

„Við erum bara að fræða almenning um hætturnar sem geta fylgt fylliefnum, sérstaklega í höndum ófaglærða aðila. Þegar fylliefni eru notuð er mjög mikilvægt að þekkja anatómíu andlitsins, til dæmis hvar helstu æðarnar liggja og taugar. Ef það er farið óvarlega geta æðarnar annað hvort fallið saman vegna þrýstings eða óvart fylliefni farið í æðarnar. Í versta falli getur það leitt til dreps í húðinni og jafnvel blindu,“ segir Jenna í viðtali við mbl.is.

Jenna vinnur á Húðlæknastöðinni, en stöðin birti nýverið skjáskot af fylliefnum sem hægt er að kaupa á vefversluninni Ali Express. Jenna segist ekki hafa heyrt um neinn sem hafi keypt þessi efni af Ali Express en viti þó um nokkur dæmi þar sem fólk hefur farið til aðila í heimahúsu í varafyllingu.

„Þá vita þessir einstaklingar oftast ekki hvaða efni voru notuð. Á þetta oftast við um fylliefni sem eru sett í varir,“ segir Jenna og ítrekar að landsmenn skuli varast slíkar „bílskúrsmeðferðir“. „Á Húðlæknastöðinni starfa einmitt tíu sérfræðimenntaðir húðlæknar sem hafa allir tök og leyfi til að grípa inn í ef illa fer. En oft hafa þau þurft að lagfæra eftir svokallaðar „bílskúrsmeðferðir“.“