Fyrr í dag deildi Engilbert Arnar Friðþjófsson, oft kallaður Costco-kóngur Íslands og stjórnandi Facebook-hópsins Costco – Gleði, innan þess hóps mynd af meintum málshætti úr páskaeggi sem á stendur: „Þú máttir nú ekki við þessu, feita fífl“. Augljóslega er um grín að ræða en fjölmargir innan hópsins telja þetta þó grátt gaman. Ekki er ljóst hvort málshátturinn hafi komið úr páskaeggi eða hvort þetta sé einhvers konar fölsun. Mynd af þessum meinta málshætti hefur verið deilt víða á samfélagsmiðlum undanfarna daga.
„Ég ætla bara að vona að þessi sem myndin er af sé EKKI úr páskaeggin heldur eitthvað djók,“ segir Karólína nokkur til að mynda. Önnur kona svarar henni og segir þetta nú vera saklaust grín. „Þetta er úr páskaeggi, en samt djók….maður þarf bara að hafa smá húmor,“ segir sú kona.
Fyrrnefnd Karólína svarar til baka að það verði að hafa í huga að börn gætu fengið þennan meinta málshátt. „Það er minnsta málið að hafa húmor fyrir þessu en ég hugsa bara til krakkana sem myndu fá þetta,“ skrifar hún. Jón nokkur tekur undir þetta og segir: „Uuu nei… það er verið kalla fífl feitt… allt í lagi að vera feitur en það er ekki í lagi að vera fífl… ef fíflið væri með gleraugu, þá myndi maður segja gleraugna glámur…“
Gunna nokkur segir þennan málshátt einfaldlega viðurstyggð. „Það er skelfilegt að sjá svona óþverra koma úr páskaeggi, hvað ef barn (jafnvel fullorðinn) er að berjast við þó ekki sé nema litilvæga yfirþyngd, hvernig heldurðu að viðkomandi barni liði? þetta er viðurstyggð,“ skrifar hún.
Þessi meinti málsháttur er gagnrýndur víðar en í hópnum Jákvæð líkamsímynd en þó taka flestir þessu gríni af jafnaðargeði. Tónlistarkonan Þórunn Antonía Magnúsdóttir bendir til að mynda á að líklegast hafi einhver prentað þetta út og að málshátturinn komi ekki frá framleiðanda páskaeggsins. „Þetta er bara grín sem einhver prentaði út,“ segir hún.