Þorsteinn Þorsteinsson vörustjóri Nokia hjá Origo fagnaði nýlega fimmtugsafmæli og fór af því tilefni í afmælisferð til Svíþjóðar og hélt uppá stóra daginn úti.
„Ferðin var meðal annars farin út af fimmtugsafmæli mínu og líka út af þrítugsafmæli frænku okkar. Við eigum stóra fjölskyldu í Svíþjóð sem við erum í mjög góðu sambandi við og förum reglulega út,“ segir Steini. „Við fórum út um allt og heimsóttum vini og ættingja, sem við eigum um alla Svíþjóð.“
Ein af frænkum Steina í sænska ættboganum er Camilla Läckberg rithöfundur sem vakið hefur heimsathygli fyrir glæpasögur sínar, meðal annars hér á landi, þar sem er hún er mjög vinsæl.
„Camilla og pabbi eru bræðrabörn,“ segir Þorsteinn, en faðir hans er hálfur Svíi og bjó í tíu ár í Svíþjóð, en flutti aftur heim í fyrra. Camilla hélt afmælisveislu fyrir íslenska frændann, sem sló svo sannarlega í gegn hjá afmælisbarninu og öðrum gestum.
Camilla er ótvíræð drottning glæpasagnanna og hefur verið kölluð „hin sænska Agatha Christie“. Fyrsta bók hennar hér á landi, Ísprinsessan, kom út árið 2006 og hafa alls 14 bækur hennar verið gefnar út hér, sú nýjasta núna í ár, Gullbúrið.
„Þetta er bara einn dagur enn,“ svarar Steini aðspurður um hvernig var að ná fimmtugsaldrinum, „en gríðarlegur þroski sem er tekinn út á þessum degi. Ferðin var skemmtileg reisa og mikið af ættingjum úti þannig að ég fékk eiginlega þrjár veislur út úr ferðinni.“
Aðspurður hvort hann ætli að skella í stórafmælisveislu hér heima, svarar Steini: „Nei ég held bara ekki, þetta er eiginlega orðið nóg. Nú býður maður bara eftir sextugu, held kannski veislu þá.“
„Bara halda áfram að vinna og lifa lífinu,“ segir Steini spurður um hvernig hann ætli að verja seinni helmingi ævinnar.