Hinn kunni danskennari Bára Magnúsdóttir, stofnandi Jazzballettskóla Báru og eigandi JSB líkamsræktar og danslistarskóla, lenti í óþægilegu atviki í gær sem reyndist síðan vera uppspretta mikillar gleði.
Bára var stödd við afgreiðslukassa í Bónus og stóð frammi fyrir því að geta ekki greitt fyrir vörurnar sem hún var að kaupa. Fyrst mundi hún ekki pin-númerið á nýja greiðslukortinu en þegar henni loks tókst að muna það reyndist ekki vera heimild á nýja kortinu.
„Hvað er í gangi? Sumir dagar eru bara svona,“ hugsaði Bára með sér. Mitt í vandræðum Báru var hjálpin hins vegar á næsta leiti. Fyrir aftan hana stóð maður sem sagði:
„Engar áhyggjur. Ég skal borga þetta fyrir þig.“
„Í alvöru?“ spurði Bára hissa.
„Já, þú leggur bara inn á mig. Ég treysti þér.“
Bára segir í samtali við DV að hún sé enn í gleðivímu vegna atviksins. „Ég hef óbilandi trú á okkur mannfólkinu,“ segir hún.
Atvikið gladdi hana ekki aðeins vegna þess að maðurinn hjálpaði henni úr tímabundnum vandræðum og neyðarlegri stöðu heldur miklu fremur vegna þess að hún telur þetta vera til vitnis um gott hugarþel og náungakærleik í samfélaginu. Henni þykir líka gott að búa í samfélagi þar sem fólk sýnir hvert öðru svona mikið traust.
Maðurinn sem hjálpaði Báru heitir Tryggvi. Að sjálfsögðu er hún búin að greiða Tryggva skuldina. Hún segir:
„Ég mun ekki gleyma þessu atviki og með glöðu geði tek ég Tryggva mér til fyrirmyndar!“
