Gabrielle Crahan, 22ja ára gömul dóttir Shawn Crahan, trommarans í Slipknot, lést síðasta laugardag. Trommarinn tilkynnti þetta á Instagram á sunnudag.
„Það er með brostið hjarta og frá dýpsta stað sársaukans að ég þarf að segja ykkur að yngsta dóttir mín, Gabrielle, lést í gær,“ skrifar Shawn, sem oft gengur undir listamannsnafninu Clown, við mynd af dóttur sinni heitinni.
Dánarorsök hefur ekki verið gerð opinber, en síðasta myndin sem Gabrielle deildi á Instagram táknaði vissulega mikinn fögnuð. Hún birti mynd af AA-merki sem táknaði fimm mánaða edrúafmæli, en hún deildi myndinni aðeins þremur dögum áður en hún lést.
Gabrielle skilur eftir sig systurina Alexandriu og bræðurnar Gage og Simon, sem og móður sína, Chantel Crahan. Simon tjáði einnig sorg sína yfir systurmissinum á Instagram.
„Dagurinn í dag er sá erfiðasti í heimi. Ég er ringlaður, ég er reiður, ég er sorgmæddur og ég er bara virkilega, virkilega leiður,“ skrifar Simon. „Gabri, ég sakna þín svo mikið. Við vorum bestu vinir.“
Systir hennar Alexandria segir mikið skarð hafa myndast í fjölskyldunni við fráfall Gabrielle og biður fólk um að velta sér ekki upp úr andláti hennar, en nú þegar hafa miklar umræður farið fram á Reddit þar sem fólk veltir fyrir sér hvað dró þessa ungu konu til dauða.
Corey Taylor, söngvari Slipknot, vottar fjölskyldunni samúð sína á Twitter.
„Vinsamlegast hugsið vel um Crahan fjölskylduna og sendið henni ást. Hennar [Gabrielle] verður sárt saknað.“
My heart has broken for my brother. Please keep the Crahan family in your thoughts and love. She will be missed.
— confirm: 0-0-0… DESTRUCT… 0 (@CoreyTaylorRock) May 19, 2019
Shawn er einn af stofnmeðlimum Slipknot, en sveitin var stofnuð árið 1993 og nýtur gríðarlegra vinsælda um heim allan. Hljómsveitin kom síðast fram á föstudaginn í þætti Jimmy Kimmel.