Guðlaugur Þór Þórðarson utanríkisráðherra er ættleiddur. Hann er nýjasti gestur Sigmundar Ernis í viðtalsþættinum Mannamáli á Hringbraut í kvöld.

Í þættinum, samkvæmt Hringbraut, greinir Guðlaugur frá því að vera ættleiddur. Þetta er í fyrsta sinn sem hann ræðir um málið á opinberum vettvangi.

Guðlaugur Þór segir að foreldrar hans voru búnir að bíða mjög lengi eftir barni og heldur að hann hefði ekki getað fengið neitt betri umgjörð.

„Það var mikil eftirspurn eftir manni og ég hefði ekki viljað skipta við neinn þegar kemur að uppeldi og umhverfi. Kannski er allt í minningunni í einhverjum rósrauðum bjarma en það var svakalega gaman að alast upp í Borgarnesi,“ segir Guðlaugur Þór.

Hann segir frá því að hafa hitt blóðmóður sína en greinir ekki frá því neitt frekar. Hægt er að lesa nánar um viðtal Guðlaugs Þórs á vef Hringbrautar.